Прябезарькс баран

Вейке велесэ эрясь Баран. Эсь прянь шныця ды лавгамо вечкиця. Бажась лия лангсо пейдеме, ансяк сонсь пейдема таркакс лиснесь. Весть сон пелькстазевсь Чиря атяка катканть марто, сень кувалма, кие куроксто кузи кудонть пряс ды истя жо куроксто валги мекев.
Каткась пейдезевсь Баранонть валдонзо, мери:
– Чаула! Паряк тонеть лато прява кузнема? Виде киява молят пупорькшнят, сэдь ланга ютат сяворькшнят.
– Тон тонсь    прявтомо каткат! – отвечась Баранось. – Вант!
Теде мейле Баранось кирнявтсь пенге оровтонть лангс, мейле утом латонть лангс, кудыкельксэнть лангс… Ды кармась куземе кудо латонть ланга уштома трубантень. Кузсь, кузсь, пильгензэ нолажтстсь, ды чаразь-велязь прась масторов. Синдизе вейке сюронзо.
Чиря каткась пейди:
–   Истя теть эрявияк, Баран! А кармат кузнеме кува лияненьгак а мереви!
Чары вальмалга вейке сюро марто баранось, вастызе Киска, кевкстни:
– Баран, ков сюрот теик?
– Ды вана вирьсэ ульнинь, идем туво марто кечкеринь ды синдия сюром.
– Кенгели Баранось, – мери Чиря каткась, Кисканть ды Баранонть кортамост марязь. – Лато пряс кузсь превтемесь ды прась тосто.
– А тонеть кодамо тев? – кежейстэ аволдась вейке сюросонзо Баранось.– Мон вейке сюросояк тонть кечкеретян.
Кискась чаравтызе прянзо, мерсь: «Тынь уш тынсь эсь юткованк кодаяк тевенк ладсинк!» ды тусь.
Порни Баранось тикшеде пирявкс вакссо, кенкшка Сея прянзо ливтизе. Кевкстни:
– Ме-е… Те кие, Баран, сюрот синдизе? Тюрить, паряк, киньга марто?
– Вирев якинь, – мери Баранось. – Верьгиз тосо вастынь. Сонгак, монгак ки эзинек максо. Ды вана емавтыя сюром се тюремасонть.
– Мезть кенгелят, Баран, таго мери Чиря каткась. – Пря шнась – лато пряс кузиксэль, прась ды кадовсь сюровтомо.
– А тонь а кевкстнить, тумо пря катка! Вана валгат – пильгсэ шешктян.
– Вай, кодат а ладямонь тесэ тынк тевенк! – мерсь Сеясь ды кекшсь   кенкшенть удалов.
Баранось седе тов ульцяванть тикшеде порни. Моли Вазнэ, кевкстни:
– Те кие марто, Баран, истя тюрить, натой сюроткак синдик?
– Вирьсэ овто марто! – отвечи Баранось.
– Овто марто!? Изникак сонзэ? – кевкстни Вазнэсь.
– Нама изния. Чиинь, чиинь кечкердия, ды сеске латкс правтыя!
– Кинь тон кунсолат, Вазнэ? – таго кортамонтень човорявсь Чиря каткась. Превтемесь лато лангс кузсь ды прась. Ха! Ха!
Састь Баранонть кежензэ катканть лангс ды тусь ардозь мельганзо.
– Тон, чинев чеерень патя! – пижни ульцянть келес. – Сасатан, начко таркаяк а кадан!
Каткась кирнявтсь пенге лангс, Баранось мельганзо. Каткась утомонть лангс, Баранось мельганзо, каткась лато лангс, Баранось мельганзо. Таго трубанть ваксс кузсть.
– Вана понгить ней, чаво пря катка! Кечкеретян, пильге алов нула эйстэт теян!
Каткась кирнявтсь труба лангс. Баранось чийсь ды   конясонзо цярадизе трубанть.
Трубась ульнесь кшнинь эзь калавтово. Каткаськак эзь правтово. Прябезарькс Баранось жо омбоце сюронзояк синдизе ды алов кеверсь.
Ней Баранось яки сюровтомо, секскак, кие а соды, мезе мартонзо лиссь, арси, буто тикшеденть порни реве.
Вана истямо тев лисекшнэсь Баранонть марто вейке велесэ.