Полавкст

Онги киска, та-кинь сёвны, тон марясак?
А кармавтсак чатьмонеме, а кардасак.
Коштонть кежейстэ автори, теке суски,
Рисьменть, конань вельде содозь, сези-уски.

Кунсолока, кода моли сон тонь ёнов!
Тонгак содозят кеместэ, тынь — ве понань!
Тонгак ирнат, меште раздят сонзэ ладсо
Ды копореть трокс понгонят... ологасо.

Ансяк кискась, сеяк вадрясто чарькоди:
Ки пек бажи — сезьсы рисьменть ды оргоди.
Тон рисьмезэтькак тонадыть, теке эрьгес.
Мештеть келей, тов ламо нарьгамот кельгить.

Мезе ёртыть церепказот — се теть саты.
Паряк арсят, ловажадонть вачось матры?
Вачось матры. Мезде седеесь пешкеди?
Варштакая, кискань пильгекс велявтсть кедеть!

Стака кемезевемс — эрсить истят полавкст.
Кона шкане тонь вельтинзить тусто понась?
Кирьгат перька астяко тапарявсь рисьмесь:
Тон а бажаткак потстонзо менемс-лисемс.

...Вень чоподанть, чинь чоподанть колы вайгель,
Ков илязан кекше, сон пилесэнь гайги.
Зярс цидярдан мон неть гайттнень кунсоломо?
Таго урны... аздан киска, аздан ломань.