Пиже кшни
Владька ды Максим ютасть шабра велень клубсто. Эскелясть эрязасто (ды лиякс од рунгось а маштыяк), вейке-кавто, вейке-кавто — шешксть-лепштясть кевень килангонть, сэвезь сэвсть калгодо метратнень. Мартост ульнесть кемень сигаретат, пия сулика, чопода-сэнь менельганть ловсонь петнявксокс пургсезь тештеть, каштмолеманть потс копачазь опаня лембе ды вете вайгельпеть кудост видьс. Сэтьмечинть эйстэ аламодо ве ёно пижнесть паксяцирькунт. Ды сыньгак прок молицятнень мартольть. Цёратне ютасть кинть куншкава ды гайтевстэ, марявольть паксятнеяк, кортнесть.
— Ванан — те дригась сивезэть недясь, — эль-эль кенерекшнесь таркаваст валтнэнь путнеме Максим. — Удалдо састынестэ молинь, пилес тензэ — шлагор! Тона — бот прась, теке эзь аштеяк.
— Ага, — Владька мельспаросо нолдызе кургостонзо качамонть ды копордась пиядо. — Брюс Ли тонь вакссо — потяка эйкакш!
— А те кие ульнесь? — кевкстсь Максим.
— Брюс Ли?
— Ды аволь, конатань сявордыя.
— Мон косто содан? Алкаш таго-мень. Педясь тень — адя, келя, листяно. Улема, тапимим киньгак марто.
— Мезеяк, превензэ витинь, ней а карми тапамо. А омбоцесь, конань тонсь лупсовик, кие ульнесь?
— А-а-а, те теня, Кошелень Андрей. Вейсэ тонавтнинек. Лупсовик… Эстеньгак понгсь, — вадяшизе сэньшкадозь сельмензэ Владька. — Вадря, иредезь ульнесь, истяк а правтоволь, шайтянось. Шумбра, теке бука.
— Мон редия. Вейке кедьсэ кенкшка ливтимим! Мезе тензэ эрявсь, ков эцесь, — татаргак эзинь чарькоде.
— Ды Андрей сонськак эзь чарькоде! — раказевсь Владька. — Валске сти ды карми ледстнеме, мекс ирдезэнзэ сэредить. Паряк, цёранть содасы, кисэнзэ стясь?
— Ки соды, — мерсь Максим. — Весе слепат, весень мокшнатне кинетить. Вадря, шкастонзо туинек клубстонть, эсенек ирдезтнэ апак менче кадовсть.
— Ага, те истя. Веленек вачкавольть! — Владька варштась менеленть лангс. — Вадря течи весь, мазый.
— Кода а мазый, бути таго Олянь ильтеме якить, — менеленть лангс апак вано, мерсь Максим. — Ёвтнек, лиссь мезеяк?
— Уцяска лиссь, Макс, уцяска! — апак учо пижакадсь Владька, чиезь напустясь икелев ды эрьва валонть пезнавтозь пезнавтызе коштонтень. — Монь! Течи! Ули! Уцяскам!
— Э-э-э-э, ужо! Ков сёлмосот аволят? — нолдась мельганзо Максим.
— А тон? Вастык Светань? — лоткась Владька ды варштась ялганзо лангс.
— Арась, эзь са, кортыть.
— Косо эно ульнить?
— Васня модамартнень потмова «ялганок» эйстэ чийнинь. Колмо пирявкст сявордынь, прямгак эзия велявто. Киргизпень пиретнень пачк теке танк ютынь.
— Те мезе, чийнесть мельгат?
— Теке верьгизт, — пейдезевсь Максим. — Вадря, Наташа тень понгсь. Терраскав совавтымим.
— Кодамо Наташа?
— Ды Болдырева. Раужо пря истямо, алкине. Сюкпря тензэ, макссь тень «политической убежища».
— Ды мезе?
— Мезеяк. Кортнинек, палсинек, мейле сыргинь пия мельга.
— Ну тон, Макс, цёра! — таго рангстась Владька. — Светань ней ков тейсак?
— Кадык таркасонзо ашти, — нурькинестэ мерсь Максим.
— Цёра! Алкуксонь цёра! — Владька вачкодизе ялганзо лавтов ланга.
Ютызь Чей эрькенть, козонь эль эзть эце экшелямо. Пиясь прядовсь. Менелентень окойники инжекс сась ковось. Казнекс кандсь ашо валдо. Цёратне, теде-тонадо кортнезь, пачкодсть калмазыренть видьс — ней кадовсь ансяк велявтомс паксянь кинть лангс ды пире удалга валгомс велень куронтень.
— Ужо! Вием маштсь! — мерсь Владька ды озась видьстэ кинть куншкас.
— Ули истямо тев, — новольсь ваксозонзо Максим.
Чатьмонезь ушодсть таргамо.
— Димканень валгтано? — кевкстсь Владька.
Кевкстсь истяко, каршо валонь апак учне. Цёратне свал, зярдо ютнесть те таркаванть, валгонесть Диманень. Куш кепедезь кинть ало сон арасельгак — рунгонзо саизе калмазырень кежей модась, — цёратнень лангс ялатеке вансь кшнинь пиже крёст ды фотографияс кельгстязь Димкань чамазо. Ютазь кизэстэнть течинсенть ёнов молиця весь саизе Димань та-ков васов. Максимень кадызе теске. Сынь кавонест ардсть мотоцикласо, ветясь, нама, Дима. Сон эйкакшпингестэ саезь эрьва кшнинть марто маштсь мик кортамояк. Ульнесь ялгаст чачома чизэ, ульнесть раксемат, поздоровт ды цяркат... Максим мерсь, пряс эзь кадовояк, кода сынь прасть. Панжинзе сельмензэ — лекси. Дима эзь лексе. Прязо вачкодевсь кевень алкине палманьс, кона аштесь кинь пурдавксонть чиресэ ды конань омбоце чистэнть цёратне сявордызь тракторсо.
Сестэ чокшне ёнов ютась лембе пиземе ды весень симдинзе. Таго-мекс цёратне симсть аволь сондензэ, таго-мекс Владька эзь сырга мартост, кадовсь тейтерь ваксс. Таго-мекс неть валтнэнь сталмост покшолгадсь, зярдо куломась тердизе Димань эстензэ. Икеле весе валтнэ ульнесть чавот, эрямось лексесь шождасто, марясь эсь виензэ, кода течинь чокшнесь, ды мездеяк эзь пеле, кода Дима. Манявсь эрямось, пупордясь ды кулось.
Истя лиснесь, Димань ялганзо седе сеедьстэ сакшность аволь калмазырев, тей — пиже кшнинтень.
— Марят, Макс, а мекс крёстось пиже тюссо артозь? — кевкстсь Владька дамбанть алов валгомсто.
— Аздан, — пиже кшнинть лангс ванозь, мерсь Максим.
— Седе сеедьстэ… — ушодсь кортамо Владька ды нолажтсь алов.
— Мезе? — эзь чарькоде Максим. — Тон косат?
— Тесан. Тей-тов, туды-растуды сонзэ, — кутьмере лангсо мадезь, а паро вайгельсэ ботнозевсь Владька. — Мон мерян, седе сеедьстэ крёсттнэнь сэнь тюссо артыть…
— Артызь кода артызь… — састо нолдынзе валтнэнь Макс, валгсь алов ды таго педявтынзе сельмензэ крёстонтень. — Аволь тюссо тевесь.
— Мейсэ эно? — кевкстсь Владька пацькавозь удалксонзо чукамсто.
— Ёвтамс, мейсэ? — та-кода а чарькодевиксстэ варштась ялганзо лангс Максим. — Ёвтаса. Димка — тосо, — кедезэ венстевсь калмазыренть ёнов. — Мон — тесан. Монень мезеяк эзь тееве: эрян, симан, тейтерть палсян. А ледстнянгак, кода куломась нолштымим. А кемангак — кемень сантиметрат, ды кавонек чувтонь кандолазс мадевлинек…
— Ды мезть теде кортамс, — мерсь Владька. — Истя кшнинь целковоесь прась. Чавовлиде кавоненк, кинень седе шожда улевель? Димка арась, минек тевенек — ледстнемс. Сонзэ вана тевензэ берянть… Ды а витевить сынь, кода иля янксе.
— Тон содат, кие се целковоенть ёртызе? Минсь? Пазось? Кие? — чаразь-велязь ливтясь Максимень гайтев вайгелезэ паксянть велькска. — Ёвтык тень, кие? Кие монь идимим? — сорныця кедьсэ ёвкстызе сигаретанть кургозонзо. — Тон неик, кода лангозон Димань лелязо ваны? Аволь ваны — эскесэ пельни. Чатьмони. Кедем лепштясы — теке сеземензэ эйстэнь бажи. Ды чатьмони… Теке мон мезеяк а марян… Теке а неян — чумонды монь.
— Э-э-э, Макс, ки соды мезть иля корта, — Владька путызе кедензэ ялганть лавтов лангс. — Тонь, монь — весень лангс Никита ваны вейкетьстэ, истямо сон ломанесь. Теке мерят аволь минек масторсто. Косто истят арсематне прязот совасть?
— Тосто, — нолдызе прянзо Максим. — Марян мон.
«Ды содан, — нусманясто вайкстась Максимень потмоёжозо. — Меельцесь, кие тень зярдояк маняви, — те Никита». «Эрямонть, ялга, — прязонзо апак учо састь Никитань валонзо, — эсь кедьсэ кирдть, вечкть ансяк эсь прят. Иля янксе ды иля веше чумонь нолдамо. Эряк кода лексят. Тейть мезе эряви». Истя мерсь тензэ Никита меельцеде вастовомстост.
«Те виде! Иля янксе!» — кепедевсь шалт оймень келей нупальсэнть. «Куватьс сатыть виеть те канстонть кандомс? — састо тошказевсь потсонзо лия вайгелесь. — Тон теить, мезе эряви?»
— Саты чаво валт кортамс! — сезинзе арсеманзо Владька. — Тонсь мерить — марян. Марямось, ялгай, се-е-едьстэ манчи.
— Вадря, улевельгак истя, — мерсь Максим.
Цёратне кепедевсть мекев килангс ды апак капша сыргасть.
Ш-ш-ш-ш… — марявсь, кода удалост а васоло машинань чаротне судрясть асфальтонть.
— Некак, кие-бути арды, — мерсь Владька ды варштась удалов.
Курок цёратнень сасынзе машинаськак. Лоткась ваксозост. Икельце кенкшесь панжовсь, ды потстонть нолдызе вайгелензэ Никита:
— Кудов, цёрат? Адядо усктадызь!
— Ды минь тияко, пирева валгтано… — кортазевсь Максим.
— Адядо, адядо, озадо! Мезть карматадо ялго якамо. Кудо видьс усктадызь, — эзь пота Никита.
«Кие мерсь, эрямось аволь фильма? — машинантень озамсто арсезевсь Максим. — Теи сень, мезенть зярдояк а учат».
— Владька, Макс! Косто истя тынь? — велявтызе прянзо икеле озадо аштиця тейтересь ды, цёратнень чатьмонемаст чарькодезь, поладсь: — Мезе, эзинь содаво?
— Настя! Кода истя тей понгить? — васенцекс муинзе валтнэнь Владька ды палызе тейтеренть чамаумарьс. — Зяро кизэть, зяро телеть! Ков ёмакшныть?
— Шумбрат, Настя, — мерсь Максим. — Видеяк, косолить? Кавтошка иеть эзитинь нее! Стувтык, нать, тиринь ёнксот!
— Алкуксонь «встреча на Эльбе», — пейдезевсь Никита ды сыргавтызе машинанть таркастонзо.
— Мезеяк мон эзинь стувто, — мерсь Настя. — Московсо важодян, эль менинь велев! Ванды мекев туян. Тынсь кода тесэ? Косо васенце алужом?
— Кодамо алужот? — Никита теизе прянзо а чарькодицякс.
— Кодамо, кодамо… — мизолдозевсь Настя. — Ды Димка. Те шкас прястон а лисни, кода инзей потсо мартонзо палсинек! Мекс аволь тынк марто? Тынь свал колмоненк ульниде. Мезть чатьмонтядо, косо?
— Онот, а васоло, — Никита аволдась прясонзо калмазыренть ёнов.
— Мезе? — эзь чарькоде тейтересь.
— Чавовсь Дима. Мелят уш… — таго мерсь Никита.
— Кода?
— Ки соды кода. Кевкстемскак а кинь, — Никита варштась Максимень лангс. — Ёвтник, Макс, кода. А-а-а, тонеть беш а ледстяви мезеяк. Сестэ монсь ёвтнеса. Ансяк арась, паряк, невтьсаяк.
Никита лоткавтызе машинанть ды мейле сеске велявтызе мекев.
— Мезть теят? — кевкстсь Максим, эсь пачканзо Пазонтень энялдозь — кадык оймавтсы истя эрязасто чавиця седеензэ.
— Ужо, невтьса Настянень, кода Дима чавовсь, — апак тално мерсь Никита, ды машинась сезевсь таркастонзо.
— Э-э-э, ков панят? — аламодо тандадозь кевкстсь Владька.
— Дима марто Макс ардсть Аловелестэ мотоцикласо, — теке мезеяк апак маря, ушодсь ёвтнеме Никита. — Кадык минь машинасо, ды ялатеке — техника. Эрязасто ардсть, теке минь! — ды пезнавтызе пильгензэ газонтень.
— Ков, Никита, ков?! — пижакадсь Настя.
Максим ансяк пекстынзе сельмензэ.
— Сынь ульнесть иредезь, — поладсь Никита. — Ужо, тейсынек, — мерсь цёрась, таргась та-косто озамонть алдо чапамо марто сулика, килангонть ёнов апак вано, панжизе ды ушодсь симеме.
— Никита!!! — таго пижакадсь Настя. — Лоткак!!!
— Ху! — лекстясь Никита ды ёртызе суликанть вальмава. — Ды вана те пурдавкссонть сынь эзть карма лотксеме, арсесть, Пазось сынст вечксынзе! Вансынек, вечксамизь-арась минек!
— Тон мезть?! Лоткак! — рангстась Владькаяк.
— Иля пеле! Сатано Димканень инжекс! Вана кеци! — пижакадсь Никита.
Машинась эрязасто велявтсь, ветицясь ноцковтызе лоткавтомканть, ды ардомапелесь, удалце чаротнесэ кинть коцькерязь, эль кельгстявсь теине кинь пурдавксонтень. Бах! — вачкодевсь мезес-бути машинань икельксэсь, ды сон лоткась.
— Истя, Макс, тевесь ульнесь? — колызе стакасто лексиця чатьмонеманть Никита.
— Тон — превтеме! Превтеме псих! — ёртсь Настя ды ушодсь чавомо Никитань вишка кеднесэнзэ.
— Паряк, истя… — мерсь Никита ды лиссь машинастонть.
Лиятнеяк лиссть мельганзо.
— Мезть ней, молян понкстнэнь полавтсынь! — кургонь келес мизолдозевсь Владька ды нежедсь машинань удалксонтень. — Ну тон, Никита, алкуксонь камикадзе…
— Киска лепштинек, — мерсь Никита, машинанть икелев ванозь.
Тосо, видеяк, верев боканзо стакасто кепсезь, майсесь покш тюжа киска.
— Вана кода! — серьгедсь менелентень Никита. — Вешнинь кулома эстень, муинь кискантень! Сюкпря теть! — Ландясь кисканть ваксс. — Тонетькак сюкпря.
— Аволь истя тевесь ульнесь… — кисканть лангс ванозь, мерсь Максим.
— Мезе? — Никита велявтызе прянзо ды стясь.
— Мон мотоцикланть ветинь, — варштась чамазонзо Максим. — Сестэ мон ветинь. Дима пижнесь пилезэнь: «Иля пане, седе састо!». А содан, мекс эзия кунсоло. Ды мейле…
— Мейле, нама, тандадыть — озавттадызь, — прядызе кисэнзэ Никита.
— Цёрат, цёрат, ужодо… — пелезь стясь юткозост Владька.
— Мезенть учомс? — кевкстсь Никита. — Дима арась… Арсят, мон ней пеель марто каяван Максонь лангс?
— Кие содатанзат… — састо мерсь Владька.
Апак учо кинть лангсо аштицятнень ушодсь нолсеме шожда вармине. Та-косо велесэ онгозевсь киска. Сонзэ каршо моразевсь атякш. Марявсь начко луганть кельме чинезэ ды танстезэ.
Максим чатьмонезь сыргась а васоло аштиця пиже крёстонть ёнов, прась икелензэ кумажа лангс ды састо мерсь:
— Нолдык чумом, Димка. Нолдык…
— Сон а нолдасы! — рангстась Максимень кутьмерьс Никита. — Мон нолдаса, цёра. Эряк, иля мелявто… Эсь прянть чумондомс — а покш тев. Эрямс Димкань кисэ ды теемс мезеяк покш ды вадря — вана те, цёра, покш тевесь. Ансяк теяк Диманень а лезды… Сонензэ мезеяк а лезды.
Никита озась машинас ды тусь ардозь.
— Ды мезе тесэ истямо ульнесь? — максызе вайгелензэ Настя.
— Мезеяк, — мерсь Владька.
Колмонест од ломантне чатьмонезь сыргасть велень пире-
тнень ёнов. Седе ламотне эйстэст видезельть тикшесэ. Курок ломантне кармить аволямо пелюмасо, ды, ливезенть чамасто нардтнезь, кияк а ледстясыяк, косо ней Дима од цёрась. Весе эрить ды важодить.
— Ёвтник? — Максимень сельмензэ икеле, голландкантень кутьмерензэ нежедезь, аштесь Дима.
Сувтомо, сёлмовтомо. Аштесь — кода аштить весе. Мизолдсь.
«Онстон сась. Ялатеке муимим, — арсезевсь Максим. — Умок онт эзинь некшне».
— Ёвтник, мерян? — таго кевкстсь Дима.
— Ёвтния, — Максим стясь удома таркастонзо.
— Седе шожда кармась?
— Аздан. Та-кода а маряви…
— Мейле марясак. Тосо ули пек берянь, бути эрямсто а ванськавтсак ойметь, видечинь повицянь лем кармат кандомо.
— Косо — тосо? — эзь чарькоде Максим.
— Эх, ленгень пря… Косо, косо… Косан мон. Тоначисэ.
— Ды кода тосо?
— Истя жо. Велесь теке. Кудотне некеть. Коштось теке. Ансяк тосо эрить сетне, кить кулость. Содат, тосо весе, весе, кить велесэнек эрясть. Сырькаень вастыя. Эх мурни-и-имим! Мезекс, мери, а шкастот сыть? Истя, мерян, сырькай, лиссь, мезеяк а теят. Никитань иля кунсоло — эзинь кежиявто лангозот, кодат тесэ чумонь нолдамот.
— А берянтне косот?
— Кодат берянтне?
— Ну, ломантне…
— А-а-а... Тоскот. Важодить. Майсить ансяк седе ламо, пежетьксэст, кода мереви, шлить.
— Кие кармавтынзе?
— Кияк. Сынсь чарькодсть — истя эряви. Тосо весементь сеске чарькодьсак. Ну, кундык крабонть, — мерсь Дима ды венстизе кедензэ. — Паряк, седе тов зярдояк тей а саван.
— А мон тыненк? — лепштизе кедензэ Максим.
— Тонеть кувать... Кувать карман учомот, — мерсь Дима ды ёматотсь.
Максим истяк кадовськак кудонть куншкас венстезь кедь марто.
«Эряви сыргоземс, курок лисема тикшень ледеме», — мерсь эсь пачканзо цёрась ды панжинзе сельмензэ. Таго-мекс марявсь, теке сон эзь матедевкшнеяк.
— Ванан — те дригась сивезэть недясь, — эль-эль кенерекшнесь таркаваст валтнэнь путнеме Максим. — Удалдо састынестэ молинь, пилес тензэ — шлагор! Тона — бот прась, теке эзь аштеяк.
— Ага, — Владька мельспаросо нолдызе кургостонзо качамонть ды копордась пиядо. — Брюс Ли тонь вакссо — потяка эйкакш!
— А те кие ульнесь? — кевкстсь Максим.
— Брюс Ли?
— Ды аволь, конатань сявордыя.
— Мон косто содан? Алкаш таго-мень. Педясь тень — адя, келя, листяно. Улема, тапимим киньгак марто.
— Мезеяк, превензэ витинь, ней а карми тапамо. А омбоцесь, конань тонсь лупсовик, кие ульнесь?
— А-а-а, те теня, Кошелень Андрей. Вейсэ тонавтнинек. Лупсовик… Эстеньгак понгсь, — вадяшизе сэньшкадозь сельмензэ Владька. — Вадря, иредезь ульнесь, истяк а правтоволь, шайтянось. Шумбра, теке бука.
— Мон редия. Вейке кедьсэ кенкшка ливтимим! Мезе тензэ эрявсь, ков эцесь, — татаргак эзинь чарькоде.
— Ды Андрей сонськак эзь чарькоде! — раказевсь Владька. — Валске сти ды карми ледстнеме, мекс ирдезэнзэ сэредить. Паряк, цёранть содасы, кисэнзэ стясь?
— Ки соды, — мерсь Максим. — Весе слепат, весень мокшнатне кинетить. Вадря, шкастонзо туинек клубстонть, эсенек ирдезтнэ апак менче кадовсть.
— Ага, те истя. Веленек вачкавольть! — Владька варштась менеленть лангс. — Вадря течи весь, мазый.
— Кода а мазый, бути таго Олянь ильтеме якить, — менеленть лангс апак вано, мерсь Максим. — Ёвтнек, лиссь мезеяк?
— Уцяска лиссь, Макс, уцяска! — апак учо пижакадсь Владька, чиезь напустясь икелев ды эрьва валонть пезнавтозь пезнавтызе коштонтень. — Монь! Течи! Ули! Уцяскам!
— Э-э-э-э, ужо! Ков сёлмосот аволят? — нолдась мельганзо Максим.
— А тон? Вастык Светань? — лоткась Владька ды варштась ялганзо лангс.
— Арась, эзь са, кортыть.
— Косо эно ульнить?
— Васня модамартнень потмова «ялганок» эйстэ чийнинь. Колмо пирявкст сявордынь, прямгак эзия велявто. Киргизпень пиретнень пачк теке танк ютынь.
— Те мезе, чийнесть мельгат?
— Теке верьгизт, — пейдезевсь Максим. — Вадря, Наташа тень понгсь. Терраскав совавтымим.
— Кодамо Наташа?
— Ды Болдырева. Раужо пря истямо, алкине. Сюкпря тензэ, макссь тень «политической убежища».
— Ды мезе?
— Мезеяк. Кортнинек, палсинек, мейле сыргинь пия мельга.
— Ну тон, Макс, цёра! — таго рангстась Владька. — Светань ней ков тейсак?
— Кадык таркасонзо ашти, — нурькинестэ мерсь Максим.
— Цёра! Алкуксонь цёра! — Владька вачкодизе ялганзо лавтов ланга.
Ютызь Чей эрькенть, козонь эль эзть эце экшелямо. Пиясь прядовсь. Менелентень окойники инжекс сась ковось. Казнекс кандсь ашо валдо. Цёратне, теде-тонадо кортнезь, пачкодсть калмазыренть видьс — ней кадовсь ансяк велявтомс паксянь кинть лангс ды пире удалга валгомс велень куронтень.
— Ужо! Вием маштсь! — мерсь Владька ды озась видьстэ кинть куншкас.
— Ули истямо тев, — новольсь ваксозонзо Максим.
Чатьмонезь ушодсть таргамо.
— Димканень валгтано? — кевкстсь Владька.
Кевкстсь истяко, каршо валонь апак учне. Цёратне свал, зярдо ютнесть те таркаванть, валгонесть Диманень. Куш кепедезь кинть ало сон арасельгак — рунгонзо саизе калмазырень кежей модась, — цёратнень лангс ялатеке вансь кшнинь пиже крёст ды фотографияс кельгстязь Димкань чамазо. Ютазь кизэстэнть течинсенть ёнов молиця весь саизе Димань та-ков васов. Максимень кадызе теске. Сынь кавонест ардсть мотоцикласо, ветясь, нама, Дима. Сон эйкакшпингестэ саезь эрьва кшнинть марто маштсь мик кортамояк. Ульнесь ялгаст чачома чизэ, ульнесть раксемат, поздоровт ды цяркат... Максим мерсь, пряс эзь кадовояк, кода сынь прасть. Панжинзе сельмензэ — лекси. Дима эзь лексе. Прязо вачкодевсь кевень алкине палманьс, кона аштесь кинь пурдавксонть чиресэ ды конань омбоце чистэнть цёратне сявордызь тракторсо.
Сестэ чокшне ёнов ютась лембе пиземе ды весень симдинзе. Таго-мекс цёратне симсть аволь сондензэ, таго-мекс Владька эзь сырга мартост, кадовсь тейтерь ваксс. Таго-мекс неть валтнэнь сталмост покшолгадсь, зярдо куломась тердизе Димань эстензэ. Икеле весе валтнэ ульнесть чавот, эрямось лексесь шождасто, марясь эсь виензэ, кода течинь чокшнесь, ды мездеяк эзь пеле, кода Дима. Манявсь эрямось, пупордясь ды кулось.
Истя лиснесь, Димань ялганзо седе сеедьстэ сакшность аволь калмазырев, тей — пиже кшнинтень.
— Марят, Макс, а мекс крёстось пиже тюссо артозь? — кевкстсь Владька дамбанть алов валгомсто.
— Аздан, — пиже кшнинть лангс ванозь, мерсь Максим.
— Седе сеедьстэ… — ушодсь кортамо Владька ды нолажтсь алов.
— Мезе? — эзь чарькоде Максим. — Тон косат?
— Тесан. Тей-тов, туды-растуды сонзэ, — кутьмере лангсо мадезь, а паро вайгельсэ ботнозевсь Владька. — Мон мерян, седе сеедьстэ крёсттнэнь сэнь тюссо артыть…
— Артызь кода артызь… — састо нолдынзе валтнэнь Макс, валгсь алов ды таго педявтынзе сельмензэ крёстонтень. — Аволь тюссо тевесь.
— Мейсэ эно? — кевкстсь Владька пацькавозь удалксонзо чукамсто.
— Ёвтамс, мейсэ? — та-кода а чарькодевиксстэ варштась ялганзо лангс Максим. — Ёвтаса. Димка — тосо, — кедезэ венстевсь калмазыренть ёнов. — Мон — тесан. Монень мезеяк эзь тееве: эрян, симан, тейтерть палсян. А ледстнянгак, кода куломась нолштымим. А кемангак — кемень сантиметрат, ды кавонек чувтонь кандолазс мадевлинек…
— Ды мезть теде кортамс, — мерсь Владька. — Истя кшнинь целковоесь прась. Чавовлиде кавоненк, кинень седе шожда улевель? Димка арась, минек тевенек — ледстнемс. Сонзэ вана тевензэ берянть… Ды а витевить сынь, кода иля янксе.
— Тон содат, кие се целковоенть ёртызе? Минсь? Пазось? Кие? — чаразь-велязь ливтясь Максимень гайтев вайгелезэ паксянть велькска. — Ёвтык тень, кие? Кие монь идимим? — сорныця кедьсэ ёвкстызе сигаретанть кургозонзо. — Тон неик, кода лангозон Димань лелязо ваны? Аволь ваны — эскесэ пельни. Чатьмони. Кедем лепштясы — теке сеземензэ эйстэнь бажи. Ды чатьмони… Теке мон мезеяк а марян… Теке а неян — чумонды монь.
— Э-э-э, Макс, ки соды мезть иля корта, — Владька путызе кедензэ ялганть лавтов лангс. — Тонь, монь — весень лангс Никита ваны вейкетьстэ, истямо сон ломанесь. Теке мерят аволь минек масторсто. Косто истят арсематне прязот совасть?
— Тосто, — нолдызе прянзо Максим. — Марян мон.
«Ды содан, — нусманясто вайкстась Максимень потмоёжозо. — Меельцесь, кие тень зярдояк маняви, — те Никита». «Эрямонть, ялга, — прязонзо апак учо састь Никитань валонзо, — эсь кедьсэ кирдть, вечкть ансяк эсь прят. Иля янксе ды иля веше чумонь нолдамо. Эряк кода лексят. Тейть мезе эряви». Истя мерсь тензэ Никита меельцеде вастовомстост.
«Те виде! Иля янксе!» — кепедевсь шалт оймень келей нупальсэнть. «Куватьс сатыть виеть те канстонть кандомс? — састо тошказевсь потсонзо лия вайгелесь. — Тон теить, мезе эряви?»
— Саты чаво валт кортамс! — сезинзе арсеманзо Владька. — Тонсь мерить — марян. Марямось, ялгай, се-е-едьстэ манчи.
— Вадря, улевельгак истя, — мерсь Максим.
Цёратне кепедевсть мекев килангс ды апак капша сыргасть.
Ш-ш-ш-ш… — марявсь, кода удалост а васоло машинань чаротне судрясть асфальтонть.
— Некак, кие-бути арды, — мерсь Владька ды варштась удалов.
Курок цёратнень сасынзе машинаськак. Лоткась ваксозост. Икельце кенкшесь панжовсь, ды потстонть нолдызе вайгелензэ Никита:
— Кудов, цёрат? Адядо усктадызь!
— Ды минь тияко, пирева валгтано… — кортазевсь Максим.
— Адядо, адядо, озадо! Мезть карматадо ялго якамо. Кудо видьс усктадызь, — эзь пота Никита.
«Кие мерсь, эрямось аволь фильма? — машинантень озамсто арсезевсь Максим. — Теи сень, мезенть зярдояк а учат».
— Владька, Макс! Косто истя тынь? — велявтызе прянзо икеле озадо аштиця тейтересь ды, цёратнень чатьмонемаст чарькодезь, поладсь: — Мезе, эзинь содаво?
— Настя! Кода истя тей понгить? — васенцекс муинзе валтнэнь Владька ды палызе тейтеренть чамаумарьс. — Зяро кизэть, зяро телеть! Ков ёмакшныть?
— Шумбрат, Настя, — мерсь Максим. — Видеяк, косолить? Кавтошка иеть эзитинь нее! Стувтык, нать, тиринь ёнксот!
— Алкуксонь «встреча на Эльбе», — пейдезевсь Никита ды сыргавтызе машинанть таркастонзо.
— Мезеяк мон эзинь стувто, — мерсь Настя. — Московсо важодян, эль менинь велев! Ванды мекев туян. Тынсь кода тесэ? Косо васенце алужом?
— Кодамо алужот? — Никита теизе прянзо а чарькодицякс.
— Кодамо, кодамо… — мизолдозевсь Настя. — Ды Димка. Те шкас прястон а лисни, кода инзей потсо мартонзо палсинек! Мекс аволь тынк марто? Тынь свал колмоненк ульниде. Мезть чатьмонтядо, косо?
— Онот, а васоло, — Никита аволдась прясонзо калмазыренть ёнов.
— Мезе? — эзь чарькоде тейтересь.
— Чавовсь Дима. Мелят уш… — таго мерсь Никита.
— Кода?
— Ки соды кода. Кевкстемскак а кинь, — Никита варштась Максимень лангс. — Ёвтник, Макс, кода. А-а-а, тонеть беш а ледстяви мезеяк. Сестэ монсь ёвтнеса. Ансяк арась, паряк, невтьсаяк.
Никита лоткавтызе машинанть ды мейле сеске велявтызе мекев.
— Мезть теят? — кевкстсь Максим, эсь пачканзо Пазонтень энялдозь — кадык оймавтсы истя эрязасто чавиця седеензэ.
— Ужо, невтьса Настянень, кода Дима чавовсь, — апак тално мерсь Никита, ды машинась сезевсь таркастонзо.
— Э-э-э, ков панят? — аламодо тандадозь кевкстсь Владька.
— Дима марто Макс ардсть Аловелестэ мотоцикласо, — теке мезеяк апак маря, ушодсь ёвтнеме Никита. — Кадык минь машинасо, ды ялатеке — техника. Эрязасто ардсть, теке минь! — ды пезнавтызе пильгензэ газонтень.
— Ков, Никита, ков?! — пижакадсь Настя.
Максим ансяк пекстынзе сельмензэ.
— Сынь ульнесть иредезь, — поладсь Никита. — Ужо, тейсынек, — мерсь цёрась, таргась та-косто озамонть алдо чапамо марто сулика, килангонть ёнов апак вано, панжизе ды ушодсь симеме.
— Никита!!! — таго пижакадсь Настя. — Лоткак!!!
— Ху! — лекстясь Никита ды ёртызе суликанть вальмава. — Ды вана те пурдавкссонть сынь эзть карма лотксеме, арсесть, Пазось сынст вечксынзе! Вансынек, вечксамизь-арась минек!
— Тон мезть?! Лоткак! — рангстась Владькаяк.
— Иля пеле! Сатано Димканень инжекс! Вана кеци! — пижакадсь Никита.
Машинась эрязасто велявтсь, ветицясь ноцковтызе лоткавтомканть, ды ардомапелесь, удалце чаротнесэ кинть коцькерязь, эль кельгстявсь теине кинь пурдавксонтень. Бах! — вачкодевсь мезес-бути машинань икельксэсь, ды сон лоткась.
— Истя, Макс, тевесь ульнесь? — колызе стакасто лексиця чатьмонеманть Никита.
— Тон — превтеме! Превтеме псих! — ёртсь Настя ды ушодсь чавомо Никитань вишка кеднесэнзэ.
— Паряк, истя… — мерсь Никита ды лиссь машинастонть.
Лиятнеяк лиссть мельганзо.
— Мезть ней, молян понкстнэнь полавтсынь! — кургонь келес мизолдозевсь Владька ды нежедсь машинань удалксонтень. — Ну тон, Никита, алкуксонь камикадзе…
— Киска лепштинек, — мерсь Никита, машинанть икелев ванозь.
Тосо, видеяк, верев боканзо стакасто кепсезь, майсесь покш тюжа киска.
— Вана кода! — серьгедсь менелентень Никита. — Вешнинь кулома эстень, муинь кискантень! Сюкпря теть! — Ландясь кисканть ваксс. — Тонетькак сюкпря.
— Аволь истя тевесь ульнесь… — кисканть лангс ванозь, мерсь Максим.
— Мезе? — Никита велявтызе прянзо ды стясь.
— Мон мотоцикланть ветинь, — варштась чамазонзо Максим. — Сестэ мон ветинь. Дима пижнесь пилезэнь: «Иля пане, седе састо!». А содан, мекс эзия кунсоло. Ды мейле…
— Мейле, нама, тандадыть — озавттадызь, — прядызе кисэнзэ Никита.
— Цёрат, цёрат, ужодо… — пелезь стясь юткозост Владька.
— Мезенть учомс? — кевкстсь Никита. — Дима арась… Арсят, мон ней пеель марто каяван Максонь лангс?
— Кие содатанзат… — састо мерсь Владька.
Апак учо кинть лангсо аштицятнень ушодсь нолсеме шожда вармине. Та-косо велесэ онгозевсь киска. Сонзэ каршо моразевсь атякш. Марявсь начко луганть кельме чинезэ ды танстезэ.
Максим чатьмонезь сыргась а васоло аштиця пиже крёстонть ёнов, прась икелензэ кумажа лангс ды састо мерсь:
— Нолдык чумом, Димка. Нолдык…
— Сон а нолдасы! — рангстась Максимень кутьмерьс Никита. — Мон нолдаса, цёра. Эряк, иля мелявто… Эсь прянть чумондомс — а покш тев. Эрямс Димкань кисэ ды теемс мезеяк покш ды вадря — вана те, цёра, покш тевесь. Ансяк теяк Диманень а лезды… Сонензэ мезеяк а лезды.
Никита озась машинас ды тусь ардозь.
— Ды мезе тесэ истямо ульнесь? — максызе вайгелензэ Настя.
— Мезеяк, — мерсь Владька.
Колмонест од ломантне чатьмонезь сыргасть велень пире-
тнень ёнов. Седе ламотне эйстэст видезельть тикшесэ. Курок ломантне кармить аволямо пелюмасо, ды, ливезенть чамасто нардтнезь, кияк а ледстясыяк, косо ней Дима од цёрась. Весе эрить ды важодить.
— Ёвтник? — Максимень сельмензэ икеле, голландкантень кутьмерензэ нежедезь, аштесь Дима.
Сувтомо, сёлмовтомо. Аштесь — кода аштить весе. Мизолдсь.
«Онстон сась. Ялатеке муимим, — арсезевсь Максим. — Умок онт эзинь некшне».
— Ёвтник, мерян? — таго кевкстсь Дима.
— Ёвтния, — Максим стясь удома таркастонзо.
— Седе шожда кармась?
— Аздан. Та-кода а маряви…
— Мейле марясак. Тосо ули пек берянь, бути эрямсто а ванськавтсак ойметь, видечинь повицянь лем кармат кандомо.
— Косо — тосо? — эзь чарькоде Максим.
— Эх, ленгень пря… Косо, косо… Косан мон. Тоначисэ.
— Ды кода тосо?
— Истя жо. Велесь теке. Кудотне некеть. Коштось теке. Ансяк тосо эрить сетне, кить кулость. Содат, тосо весе, весе, кить велесэнек эрясть. Сырькаень вастыя. Эх мурни-и-имим! Мезекс, мери, а шкастот сыть? Истя, мерян, сырькай, лиссь, мезеяк а теят. Никитань иля кунсоло — эзинь кежиявто лангозот, кодат тесэ чумонь нолдамот.
— А берянтне косот?
— Кодат берянтне?
— Ну, ломантне…
— А-а-а... Тоскот. Важодить. Майсить ансяк седе ламо, пежетьксэст, кода мереви, шлить.
— Кие кармавтынзе?
— Кияк. Сынсь чарькодсть — истя эряви. Тосо весементь сеске чарькодьсак. Ну, кундык крабонть, — мерсь Дима ды венстизе кедензэ. — Паряк, седе тов зярдояк тей а саван.
— А мон тыненк? — лепштизе кедензэ Максим.
— Тонеть кувать... Кувать карман учомот, — мерсь Дима ды ёматотсь.
Максим истяк кадовськак кудонть куншкас венстезь кедь марто.
«Эряви сыргоземс, курок лисема тикшень ледеме», — мерсь эсь пачканзо цёрась ды панжинзе сельмензэ. Таго-мекс марявсь, теке сон эзь матедевкшнеяк.
Автор: Виталий Картышкин