Пейдстиця

Мизолксонь од вадердыцясь Ботолкин Кузя кандызе лапаксавксонзо «Пизёл» сёрмадейкань «Сардо» курмос. Мекс лемдизе «Кансть», сонсь эзь сода.
«Сардонь» ветиесь — Кезапекин Федя — инженть вастызе мелень явозь, озавтызе икелензэ, кевкстнизе эрямодонзо-аштемадонзо.
Ботолкинэнь, улема, истямо кортамось эзизе нурсевте, секскак сон теке тарвазсо кев ланга кирськадсь:
— Фёдор Петрович, вана мизолкс кандынь, монсь пейдинь, пейдинь… — сонсь ёвтнеманзо ушодксонть ловнозь, алкукскак, натой икнэмас пачкодсь.
Кезапекин, мекевланг, марязенть эйстэ та-кода сэльгешка муст-муст мерема эзь муе.
Тевесь ёвтнемасонзо истямоль. Цёранть стардызе потмо орма. Сон васня ношкстась кудонзо ёнов, эзь цидярдо, кирнявтсь кансть потс. Ансяк ландясь, тосо ашо тарказонзо педясть укскат. Ков-ков, понксонь апак кепеде напустясь велев…
Сёрмадыцясь апак лотксе цяхи, ракамодонть пильгензэяк верев кепсевить, мейле одов ботаевить масторов. Кавто кедьсэ пекензэ кирдезь, тей-тов чаты, секень вант пры кияксс, карми тува велямо.
Кезапекин учизе, зярдо каршонзось лотки икнэмадо, мейле кевкстсь:
— Мезе лангсо истя пейдить?
— Хи-хи-хи… — нардтни сельме алксонзо Ботолкин. — Сёрмадейкасонк нолдасынк мизолксом, а истя кармат пейдеме.
Кезапекин тесэ кода ушоды цяхамо.
Ботолкин аймельгадсь, лып-лып сельмсэнзэ «Сардонь» ветицянть лангс.
— Мезде истя пейдят? — пелезь ладсо кевкстсь од сёрмадыцясь.
— Ней тонь мизолксонть а эрявияк нолдамс сёрмадейкасонок, пейдемам икелев пандыя теть… — алкукс раказь мерсь Кезапкин.