Пандынзе кежензэ

Эрьва иестэ Каворькань Гарай трякшны-кастни сывелекс зярыя тувот. Тедедеяк, ансяк прась ловось ды якшавтсь, сеске печксь кавто прят. Вейкенть атят-бабат ёвкстызь коцтонь покш мешокс, парсте сюлмсизь ды понгавтызь уське вельде цюланс. Омбоценть керсизь ды вачкизь тумонь парьс. Парсте вельтизь ды аравтызь кудыкельксэнь кенкшенть удалов.
Гарай меельцеде варштась эсь сюпавчинзэ лангс ды мельспаросо тошказевсь:
— Кадык аштить. Тунда сывелесь базарсо питней, каподян зепе-кавто ярмашкат...
Чинь ютазь Каворькин тусь санаторияв оймсеме. Кизэнь перть, келя, пек стомавсь, карязонзояк мик новольсть. Байтяк эрявкшнось тувотненень коромдонть. Лей прятненьгак тенст леднекшнинзе пелюмасо. Арази аламо эряви кавто пряс? Леместкак ведь тувот! Чоп андат — а пешкедить.
Малав ков витсь-петсь Гарай санаториясо шумбрачинзэ. Ёжозо вадрялгадсь, мелезэ кепедевсь — ну, виде-паро од цёра! Эль кенерсь кудов само, эзь цидярдо, мольсь сывеленть варштамо.
Ансяк кенерсь панжомо цюлан кенкшенть, тувонь рунгонть потсто — бот! — кшнинь гирякс кирнявтсь масторов айгоршка катка. Гарай пстидиксэлизе пузырь пеке бокантень, эзь понго. Качамонь понась баксорсо кузсь кудо потмарс.
Гарай нацяс ноцковтызе понгавтозь тувонть лангсто мешоконть, варштась потмозонзо ды таймазкадсь. Тувонть потмозо чаволь, ансяк кадовкшность ирдезтнэ, киртазь тюжа кедесь ды полдатне-серькатне.
Каворькин зярыяксть сорновтызе прянзо, прок пансь стака он, ды азаргадозь каявсь нинзэ лангс, кона зярс мезеяк эзь чарькоде.
— Ков ваныть полгаря сельметь, сыре курка?
— Мезть урнат вачо вергизэкс! — эзь максо пря Груня баба.
— Кода мезть?.. Варштыка тувонть потмонзо, мезе тейсть мартонзо каткатне?
Груня сась малав, ландясь тувонть алов ды сельмеэрьгензэ цють эзть лисе лангс, сон кодаяк эзь кеме эсензэ вановтозонзо.
— Сёвоньс педяст верень потийтне! Зяро сэвсть... Тонсь чумось, мерькшнинь теть миемс, а тон мезть? «Седе ламо ярмашкат лутатано». Вана теть лутынек, — чумондсь бабась Гарань эйсэ.
— Те шабрань каткась, Варкансесь, свал блуди, вачодо кирди эйсэнзэ. Сонськак истямо злыдардыця, нузякс кандо. Саразгак а кирди кардазсонзо. Яки эрьва кува теке цыганава, ансяк костояк ды мезеяк бу каподемс...
Бабанть апак кунсоло, Гарай мольсь кудыкеле парентень ды саизе лангстонзо вельтявксонть. Ваны: сывелесь кадовсь потмаксос. Туемстэнзэ эцекшнызе пряс, ней жо... Гарань превензэ мик чаракадсть, келезэ кундатотсь. Сёвнозевиксэль, ды валтнэ тензэ эзть ёвтаво. Сурсонзо ушодсь Грунянень таго-мезть невтнеме. Тонась мезеяк эзь чарькоде, тандадозь вансь мирденть лангс ды яла седе васов шаштсь эйстэнзэ. Кавто-колмо минутань ютазь азоронтень, окойники, сась вайгель, сон мезе вийть пижакадсь:
— Кона пекезэть чамдык паренть монстемень?
— Тон превстэ, нать, лисить, варьга курго? Мон малазонзояк эзинь яка ды чинензэяк вестькак эзия никсе ковонь перть, — идесь прянзо Груня.
— Эно кие сестэ сывеленть сэвизе? — пижакадсь Гарай. — Сака варштака тей.
— Вай, алкукскак кедензэ коськест салыцянть! Ведь Варкадо башка кияк эзь сакшнояк тень тондеть мейле.
Азоронть, кодак сон маризе Варкань лементь, мерят кие-бути лаз песэ пря ланга риштизе. Сон сеске фатясь, кие те нулгодькс тевень теицясь, — ансяк сон, те ривезь пуло авась. Валске неизе лисьма лангсто — чамазо прок скалонь одар, ведратнень марто юты андонь галакс.
Гарай кавто кедьсэ лепштинзе пря боканзо, мекев-васов ютась-тейсь ды таго каявсь Грунянь лангс.
— Те мезе истя улезэ... Кода теть эзь ванстово? — цякскавтсь нинзэ Каворькин. — Кадовсь ансяк килькштамс прянть, таркасонгак а аштеван горядонть!..
— Азё, азё! Оно косо левшень пиксэсь! — невтсь сурсонзо коник аксялксонтень Груня. — Мезе теят, ведь кияк эзинзе кадо кедензэ парентень. Кундавликак саламсто, сестэ лия тевесь, а ней апаргалек-иля — тевенть а витьсак.
Гарай апак корта каподизе пиксэнть ды лиссь кудыкелев. Пиксэнть пензэ верькстызе сехте вере чавозь лазонть перька, тейсь килькш ды каизе кирьгаванзо. Меньгак тамашань тевс а понгомадо, вейке пильгенть чалгизе кудопотмарс чочко пентень. Ашти истя сывель паренть велькссэ: сельмензэ велявтозь ингельде, келезэ ливтезь ды сускозь пейсэнзэ, курго бокаванзо човт молить. Варштат лангозонзо — рунгот соракады тандадомадонть.
Низэ ансяк панжизе кудо кенкшенть, сеске таймазкадсь:
— Вай, вай, вай! Пиже полам Гарай! Мезе теить эсь прят марто? — лайшезевсь Груня ды напустясь шабратненень.
Васенцекс чийсь Варка. Сон «повазенть» ёнов паро ладсо эзь варштаяк. Мезть-бути моткодсь салава молитвань кондят валт ды Грунянень наяв, мерят мезеяк эзь лисеяк, мерсь:
— Амезть пракшномс сэрьганзо, неят, сэньшкадомо кармась ды пильгензэяк чувтомсть. Азё пурныть-сэрнить куломань оршамопелензэ...
Груня ансяк кенерсь эсензэ мельга кудо кенкшенть пекстамо, Варка чопавтезь-чопавтсь сывель парентень. Цопадсь седе покш пал, нерькстызе кавалалонзо ды терявтсь каподеме эштё вейке.
Гарай олякстомтызе кирьгастонзо пиксэнть ды судонь пачк, казямо вайгельсэ кортазевсь.
— Шабра, салы-варака, кадык удалсь полданть калмамс-поминамс! Истякак весе салсик...
Варкань теке жойневтизь лаки ведьсэ. Сывель кускась — шлеп! — прась пильгалонзо, ды сон пиже-ожо вайгельсэ пижакадсь:
— Караул! Вельмесь Гарабай!
Ды прянь-полдань синдезь ношктсась кудыкельде.
Каворькин ёртызе кирьгастонзо пиксэнть, нардтнизе конястонзо ливезенть, витизе сявдиксэнзэ ды апаро мельсэ тошказевсь:
— Икелепев истят тевть а теят. Ды монськак седе  превей улян: амезть панемс ламо ярмак мельга.