Ожо лопа

Минька овтынесь чачсь тунда. Сон пек вишкинель, ды овто авазо ськамонзо эзизе кадно, вансь эрьва эскельксэнзэ мельга. Кизэнь перть Минька кассь, ёжиясь, тонадсь эрязасто чийнеме, чувтопряс кузнеме ды… авадонзо кекшнеме-орголеме. Ансяк велявты удалоёндо авака овтось, левкскесь уш вирень яннэва чии. Аволь-аволь! Сон кунсолыця левкскель, ансяк пек вечксь ськамонзо якамо, пертьпельксэнь мазычитнень ды полавкстнэнь редямо, нерензэ эрьва ков эцнеме, ливтниця нимилявтнень-унжатнень мельга пансеме.
Весть чипайсэ валозь сёксень маней чистэ овтолевкскесь якась вирень кужова ды, улема, лембеденть, валдодонть, мазычиденть судонзо алов моткодсь морыне. Чарась-велясь истя тия-тува, ушодсь чевте тикшенть ланга кеверькшнеме: оскинекс пурнави, велявты прянзо велькска. Мартонзо менелеськак, чувтотнеяк митялкат теить. Миньканень те налксемась вечкевсь. Мельспародонть сон кенярксовсто урнось ды дрягась кичкере нурька пильгесэнзэ.
Кеверезь, овтынесь пачкодсь укштор алов, ды тесэ чаманзо лангс прась лопа. Покш, мазый, ожо. Минькань абунгавтызе ожочизэ. «Мекс лиятне пижеть, сон — ожо?» — арсесь сон. Кувать арсесь. Зярдо чарькодсь, кевкстемась «а чулгови», кевкстизе лопанть:
— Тон мекс ожоят, аволь ожосо ормалгадыть?
Лопа човине вайгельсэ цихельдезевсь:
— Аволь. Монь эрямом эрявсь, виень маштсть…
— Те кода истя? — эзь чарькоде Минька.
— Мон весе виень максынь авань туртов, чувтонтень, конань пек вечкса. Ды туянгак тунда самом кисэ — ведем яказеви од лопатнева. Мон карман эрямо эсь вечкемам вийсэ…
— Монгак вечкса авань, ансяк монь арась мелем ковгак туемс, — сорнозевсь Минькань вайгелезэ.
Лопа таго цихельдезевсь:
— Превтеме! Ломантнень, ракшатнень, нармунтнень эрси лиякс. Сыресь макснесы виензэ одонтень. Одось касы-кепети, сыресь сормсеви-кукорьгады ды кулы.
Минька ледстизе аванзо сормсевезь чачонть  ды лажазевсь верьга вайгельть.
Вайгелезэнзэ ардсь авазо. Сон кутмордызе левксэнзэ, ушодсь ладсемензэ. Минька ильсезь авардемань пачк ёвтнизе тензэ мейсэ тевесь. Авазо келей лапасонзо вадяшизе цёранзо прянть ды мерсь:
— Иля аварде, Минька. Виде, мон сыредян ды кулан, ансяк те ули аволь курок. Теде икеле юты ламо шка. Тон касат покшокс, виевекс, ды тонь эсеть кармить левкскеть. Ломантнеяк, ракшатнеяк, нармунтнеяк ды мик чувтотнень марто тикшетнеяк чачить масторлангс од эрямонь максомо. Теньсэ эрямонть смустезэ…
Те ёвтнемась овтыненть оймавтызе, ды курок сон матедевсь аванзо лембе элес. Удомсто Минька несь он. Прок сон покш ды виев, яки вирень кужова. Вакссонзо мазый ды шумбра авака овто. Перькаст чийнить кавто левкскеть. Чопода-тюжинесь снартни оргодеме. Минька пштистэ ваны мельганзо ды муст-муст пейди.