Оцёр

Телесь сась апак учо. Сеске вачкодсть якшамот. Чокшнеланга увнось варма, марявсь, кудопрятненьгак калавтсынзе.
Те шкане учинек Ашинькай скалонок вазыямонзо. Секе тев савкшнось лиснемс кардазов: ванстынек, илязо кельме вазнэсь. Чокшнеланга, зярдо авам сэтьместэ нувсесь пельскодазь варьганзо велькссэ, тетям ванкшнось газета, саия керосинэнь лампанть ды лисинь кардазов. Панжия кардо кенкшенть ды абунгадынь: Ашинькаень вакссо вазнэ. Ливтязь ливтинь кудос, серьгединь тетянь-авань, ды нула потсо совавтынек кудос од эрицянть. Зярошка ульнесь кенярксонок — а ёвтавияк!
— Эрь, Мишко, кодамо лем максат вазнэнтень? Тон васенцекс неик, тонеть лемдемскак, — мерсь тетям.
Аламос арсемадо мейле максынь сёрмав конянтень лем: Оцёр. Весень мельс лемесь тусь, истя карминек меремеяк.
Читне ливтязь ливтясть. Оцёр натой кечкеремеяк кармась. Маласоль тундось, читне лембелгадсть. Букиненть пекстынек лембе кардос. Скалтнэнь нолдызь оляв.
Оцёронь аванзояк пансилинек лёмпаксяв. Монь ульнесь покш мелем молемс стада ваномо, ансяк эзимизь сайне. Вишкинян, келя. Чокшнеланга вастсынек Ашинькаень, авам потявтсы, теи вазонтень симема ведь, ды мон ливтьса Оцёрнэнь. Валске марто ветяса лей чирес, чокшне молян мельганзо.
Весть кувать кирдевинь школасо — ульнесь промкс. Сынь кудов чокшне.
— Азё андык Оцёронь. Ават ливтнесь тензэ симемс — эзизе никстяяк, — мерсь тетям.
Саия анокстазь веденть ды ливтия вазонтень. Тона мельспаросо симизе.
Кизэнь перть андынь эйсэнзэ пиже тикшинеде. Саян кескав, тарваз ды — вирев. Истя ютась кизэськак. Оцёр кассь покш вазокс. Тетям-авам кармасть кортамо печкемадонзо. Мон яла энялдынь: «Кадык эри, монсь карман мельганзо якамо».
Сёксесь яла шаштсь малав. Вармась пувазевсь седе якшамосто. Чокшнень перть авардинь, кодаяк эзь кемеве: ванды кадован ялгавтомо.
Авам стявтымим пиже вене: «Азё меельцеде андык оинеть», — ды макссь тень пидезь лавт, конатнень пек вечкилинзе Оцёр.
Карсинь кемень ды лисинь кардазов. Оцёр аштесь нусманясто. «Мари, нать, седеезэ», — кивчкадсь пряван. Путыя икелензэ ярсамопеленть. Эзь варштаяк кедьгентень. Вансь монь лангс покш раужо сельмесэнзэ, конатнестэ чудсть сельведть…
Кадык эзь машто кортамо, мон ялатеке чарькодия, мезе ульнесь седейсэнзэ: «Азор, азор, мекс потыть эйстэнь? Арась мелем понгомс пеель алов, арась…».
Мон совинь кудос. Тетям ды зярыя цёрат лиссть кардазов. Вазось ардтнесь кардазонть келес ды кодаяк эзь максо прянзо сюлмсемс.
— Мишко, листяя аламос! — серьгедсь латалдо тетям.
Лисинь. Кода Оцёр неимим, лотказевсь. Тетям максызе пиксэнть, молинь вазонть ваксс ды каия кирьгаванзо.
Кечкердемань таркас сон меельцеде нолштымим.