Вейке нешке пиресэ эрясь нузякс промине. Промотнень кудосо, содазь, эрямолувось аравтозь пек превейстэ, эрьвась соды ды топавты эсь тевензэ. Од промотне «эйде» мельга якить. Седе покштнэ – нешкентень совамо лазксонть вакссо аштить ды селминесэст кудонтень кошт панить. Весемеде виевтне ливтнить эрьва кува, натой, пек васолга, вешнить, косо седе ламо цецят, ды пачтить теде кудов. Арвонь пурныцятне мейле ливтить тов, потясызь цецяведенть, тейсызь тантей медекс ды пештясызь керязтнэва (сотат). Зярдо жо промось сыреди, селминензэ лавшомить, ушоды топавтомо седе шожда тев – сон кандтни нешкентень ведь. Ведесь нешке пиретнеде эрси а васоло, секскак сыре промонть виезэ сатны.
Нузякс проминентень мезеяк эзь тееве. Кармавтсызь сонзэ промонь эйдень андомо, эсензэ пекензэ пештясы ды уды. Эйдетне вачо аштить. Кучизь цецянь вешнеме, мезееяк эзь муе. Арвонь пурнамо – таго зыян – пекинезэ сэреди.
– Нузякс кандо тон! Весе важодить, весе тевсэть, тон нешкенек перька истяк ливтнят! – визделгавты эйсэнзэ сыре промось.
– Мон нузяксан? А нузяксан! – каршо корты нузякс проминесь. – Тон тонсь нузяксось! Мезе пек теят? Ведь мельга монгак ливтявлинь, те аволь медьарво кандомс!
Сыре промось эзь карма седее тов пелькстамо, ансяк мерсь:
– Адя монь марто ведь мельга!
Нузякскентень потамс а ен, сонсь келенть венстизе..
– Эли а ливтян? Тондеть а беряньстэ тевенть тейса! – наянгали проминесь.
Тусть ведь мельга. Лисьмапрясь а васололь. Сыре промось стамбарнэ стясь лазнэ лангс, нолдызе нерензэ ведентень ды пештизе тутминензэ. Кармась учомо зярдо ведь саи нузяксось.
Сон жо васня чарась-тейсь лисьмапрянть велькска, мейле озась а покшке кевне лангс ды, эсь прянь невтезь, велязевсь лангсонзо. Ансяк саиксэль ведь, кевнесь сыргась таркастонзо, тусь кеверезь. Проминесь эзь кенере вайкстамояк, прась ведентень. Чави селминесэнзэ нузякс проминесь, ансяк ведьстэнть а лисеви.
Неизе тень сыре промось, чарькодсь, кажось маласо, ливтясь нузякскенть ваксс ды лездась тензэ лисемс коське таркас.
Ашти нузяксось веденть чиресэ, сорны: тандадсь, кельмесь, а визьксэсь кодашка!
– Нолдык чумочим, сырькаем, – энялды прянь комавтозь. – Мон арсинь, ведь мельга ливтямось мезеяк арась.
Укстась сыре промось, мери:
– Те виде, ве ендо ванозь, лиянь тевесь маряви пек шождынекс. Кундат, апак тонавтне ды апак бажа мезеяк а теят.