Нука ды тука

Эрясть-аштесть шабрацек Нука ды Тука. Эрясть парсте, севноматкак ютксост арасельть. Ды вана весть сынь сыргасть вирев пештень кочкамо. Тука эчкель, чувто пряс а кузевиль. Нука седе човинетнеде ды шождынетнеде, сонензэ савськак пеште мельга куземс.
Кузсь Нука чувтонть пряс, сезни пеште керьмазтнэнь, ертни алов, Тука пурны эйсэст кескавс.
Кескавось уш пешкедекшнесь, венстизе Нука кедензэ меельце­ керьмазонть мельга, те шкастонть понксонзо понгсть сивезь та­радонтень ды, цирь, – сезевсть. Пеште керьмазось менсь Нукань кедьстэ, прась алов ды видьстэ Тукань сельмс понгсь.
Теде мейле Тука кичкере сельмекс теевсъ. А прости шабра­нть.
Мольсь судьянень. Евтнизе, кода тевесь аштесь, судьясь мери:
– Тердинк тей Нукань!
Тердизь Нукань. Судьясь кевкстни:
– Мекс тон Тукань сельмс пеште керьмаз правтыть?
– А чуман, – отвечи Нука. – Те пеште чувтось чумо – пон­ксон сезинзе.
Судьясь мери:
– Тердинк тей пеште чувтонть!
Сась пеште чувтось, судьясь кевксни:
– Мейс Нукань понксонзо сезить?
– Мон тесэ овсе а чуман, – мери пеште чувтось. – Сеясь тарадон поринзе, секс сезевстькак эйзэст Нукань понксонзо.
– Тердинк тей сеянть! – кармавты судьясь.
Ветизь сеянть. Судьясь кевксни:
– Мекс пеште чувтонть тарадонзо порнить?
– Секс, – отвечи сеясь, – мекс монь стадаванысь а ваны.
Судьясь мери:
– Тердинк тей стадаванынть!
Сась стадаванысь. Судьясь кевкстни:
– Мекс сеясонть а ванат?
– Азорось тень ярмакт а панды.
Судьясь кармавты:
– Тердинк тей азоронть!
– Мезть тердтнемс, теске сон! – paнгстасть судьянть кедьсэ аштицятне ды невтсть Тука лангс.
Судьясь мери:
– Лисни, тонсь чумоcь сельметь порксамосонть? Тонсеть са­ви тюрьмас озавтомс.
Тандадсь Тука ды чиезь тусь судьянть кедьстэ.