Мерезь — теезь

Сидоров Кузя важоди сёрмадейкасо. Прявтозо кармавтсь анокстамс мамштамонть зыяндонзо покш лабордейка.
Цёрась якась-пакась тия-тува, мезеяк эзь пурна. Симицятнень мартояк кортась, ансяк те мезеяк эзь максо. Лакштордыть кие мезе машты. Вейкень сельме икелев идемевсть полонявкшныть, лиянтень маряви: ковгак менелев эли тоначив ливти…
«Азё чарькодить сынст», — кеждясь Кузя. Ве валсо ёвтазь: стяконь тев. Ансяк ков туят, бути кармавтсть. Арсизе-теизе, прась истямо мельс: рамамс ашо сулика ды эстензэ ютамс тень пачка. Эряви меремс, теде икеле Кузя кельпряскак эзь петнявтне чапамодонть.
Панжизе истя суликанть, нуртясь аламошка, мамштызе… Пряс эзь тока. Омбоце «ведьгементнень» каинзе — тесэ-тосо цёковт моразевсть. Ухадинзе колмоце «ведьгементнень» — тусь ливтнеме. Я, лымбась-тейсь, валгсь мода лангс. Пряпотсонть та-мезе бийни, ансяк ялатеке превтне эсензэ. Ковгак а уи, а пры. Савсь таго нуртязенть костямс. Ваны: эха, шабра кудонть пряс омбоце сэрь полонявсь — тей-тов чаты.
— Мезеяк, лоткавтсынек!.. — аравтызе Кузя.
Тур-тар таркасонзо тейнезь, тагояк нуртясь. Кавто кедьсэ кедьгенть кирдезь, каизе чапамонть кургс… Я, ней шабра кудонть лангс колмоце сэрь стясь…
— Ва-ван-та-ка-а! Ван-ды-ы пряв-прявто-онть ик-ик-икеле ва-вал кир-кирдема. Мо-мон о-оно ме-мезть тей-тейнинь!.. — валонь апак прядояк прязо ботолкс ботадевсь морганть лангс.
Сась омбоце чись. Кузя ардсь важодема таркав, нейке совась прявтонтень.
— Ну-у? Сёрмадык? — пельнезь пельни совазенть морга экшсэсь.
— Кода меремс, Пётр Трофимович, весементь чаледия пряван, арсян мезеяк ливтемс тосто.
— Мейле, мейле мезе? — учи прявтось.
— Мон, кода «Эммануэлень» сёрмадыцясь, весементь васня эсень пачк ютавтыя, — порксни валонзо Кузя.
— Ну-у?! — цидярдомань маштомас пачкодезь, паркстась прявтось.
— Нурькинестэ ёвтазь, васняяк раминь ашо сулика, уходия… Ванса, шабрань кудось васня кавтонь, мейле колмонь сэрьсэ теевсь… — сэзны Кузя.
— Мейле?! — кеждясь прявтось.
— М-м… мейле мезе-бути ця-а-ар. Теке цётмарсо удем ланга вачкодимим…
Ансяк валске сыргозинь… — мелень кольстявозь корты Кузя.
— Мху-у, а сёрмадовксот косо? — эзь цидярдо, серьгедсь учицясь.
— А те, койсэнк, мезеяк?! Ванта, мон эрямом марто цяк эзинь яво… Те, ловт, пинге эряма истямо панжовксонть теемга!.. — Кузя прянзо велькссэ ахо-
ли керш кедьсэнзэ.
— Мху-у… — чиртизе кургонзо прявтось. — Тон мезе, вешат казне тень кис?!
— Кода эно, мон эрямом, шумбрачим эзия вансто, весе сталмонть ютавтыя эсень пачк… Секскак, паряк, кевстэ теезь-инзэдезь чачом стявтома козоньгак ош куншкас!..
Вана теть покшчи-инечи!