Марявсь, умок тонадовсь тонеть

Марявсь, умок тонадовсь тонеть,
Ломань ёнкссо эрить, эзить янксе.
Ансяк кармить некшнеме веньперть
Велень каленть, вишка пингень лавсенть.

Ледстнемазот се чувтось лиядсь,
Кассь тикшесэ тов пачтиця янось.
Мезть кортамс, тонгак лият. «Лиядт!» —
Ялатеке марят чинзэ стямос.

Тошнакалемс тунь аютко теть:
Сядо тевтне сезить эйсэть сядов.
Тон, пайстомось, пансят сэпей мельть...
Сускат кши — сеяк, маряви, сардов.

Соват кудос — кудось прок а тонь,
Вастсак ялгать — а кецявты ялгась.
Оймесь вешни эрямо умонь,
Конань трокс иетне умок чалгасть.

Пурнат-сэрнят ды ардат велев,
Эрязкалезь роднятнень содавтсыть
Ды каясак ютазенть мекев,
Прок панар, конасто умок касыть.

Ды тапарят чарыс ошов кинть,
Теке бажат киртямс вайгельпетнень,
Ардат-ардат — седееть ойми,
Тонадовозь лувс совавить мельтне.

Ёжот витевсь, тон пачколить т о в,
Потомдтнить оймень кельмевтий варят.
Ней тон ардат кудосто — кудов,
Ней кувать а тошнакадат. Паряк...