Марявсь, нупалесь а цидярдсы шалтонть...

Марявсь, нупалесь а цидярдсы шалтонть, ломантнень ды, эсь стенанзо айгшезь, сезеви нилев. Сезеви, ды потмозо лиси видьстэ пси кизэнть куншкас. Те истя тешкстасть чачома чи — симсть, киштсть ды морасть.
«Моненьгак ней а берянь улевель прянек-пильгенек чопавтомс кенярксчинтень. Ансяк арась, аштек, лия тевть прясот  якавтт, лия ёнов вант», — сэпейгавтнесь арсеманзо Марайкин Ваня ды эзь киште, эзь мора — чатьмонезь аштесь морга экш-
сэ. «Винаськак кирьгапарентень а юты!» — кежейстэ путызе тарказонзо пелевидьс симезь цяркиненть.
—  Адя, тон мезть теке наксадо чурька тесэ аштят? — ускизе та-кие ожадо.
—  Мезеяк… — чизэнзэ сядоцеде мерсь цёрась.
Кодат тосо «мезеякт», арсемадонзо — мекшень кудыне. Кода истя лиссь сонзэ марто? Мекс истя кольсь ёжозо? Вана сон, вана чокшнесь, вана Лена. Сынь — кавонест. Сыненст — уцяска. Ды тесэ та-косто лиссь Колька… Колька, конань марто сынь вейсэ сокарясть чуварсо, конань марто ушодсть таргамо кардаз удало. Колька, конань лемезэ ульнесь «ялга». Ды вана сон Лена марто... Ванянень ней мезе? Авардемс? Тюремс?..
«Куш дневникс сёрмадт арсемат-ёжот. Ловносызь — эх и авардеме кармить! — окойники мизолдозевсь Ваня. — Эряви терявтомс нейке. Весть. Ды бути а лиси — пе, мадстик толонть, пекстык кенкшенть, азё кудов».
Ваня стясь ды сыргась морганть ёнов, конань экшсэ озадольть Ленат-Колят. Ней Лена аштесь ськамонзо. Те, нама, вадряль. Кода Коля кадызе, эзь чарькодеве. Паряк, лиссь киштеме, таргамо. Кавонест тувталтнэ кенярдовтыцяльть. Коля тесэ эзь эряво. Эскелькс, омбоце... Ней мекев а велявтат. Седеесь чавсь сеедьстэ: озак, кортак — курок весемесь чарькодеви.
—  Шумбрат. Кода теветь? — озась морганть экшс Ваня.
—  Мезе тонеть пельдень эряви? — каня кежейстэ, каня талнозь варштась лангозонзо Лена. — Аволь вишкинят. Кадомак…
—  Аволь вишкинян. Касынь. Превень ялатеке арасть. Эзить кирдеве тень, туить…
—  Кирдить вадрясто. Прят иля чумондо. Истя лиссь, мезеяк а теят. Оймак.
—  Те весе?! — мик рангставсь Ванька. — Неть весе валот? Оргодить эйстэнь Кольканень ды кортат: истя лиссь? Шождасто эрят, Ленка…
—  Истя лиссь, — таго мерсь Лена. — Нолдык чумом.
—  Кода эно, нейке нолдаса… — Ваня стясь ды эрязасто лиссь ушов.
Кафенть икеле кассь килей. А мазый, чирь ды алкине. «Ды мезеяк, касы! — сонзэ лангс ванозь, апак учо арсезевсь Ваня. — Эри! Монгак цидярдса. А покш канстось».
—  Ули истямо вал — «компромисс», — каятотсь удалдо Колянь вайгелезэ, ды Ваня сеске велявтызе прянзо. — Лиякс меремс, реветнеяк эряст, верьгизтнэяк пешксеть улест, — апак капша поладсь Коля ды стясь Ванянь ваксс. — Кие теньс кеми — превтеме. Эрямось истят валт а соды… Сы шка, эряви таго-мезе кочкамс ды апак янксе молемс икелев. Тесэ уш кирдть кеместэ вейке ёнкс, — Коля чатьмонезь нолдызе прянзо ды, Ванянь каршо валонзо апак маря, ушодсь кортамо седе тов: — Мон кочкия. Ялгатне, кодат авольть уле, ялгат. Аволь сынст эряви вечкемс. Аволь сынст марто эрямс. Чарькодят, мезде кортан?
—  Вантакая, кодамо философия! Берянь, ручкам арась, сёрмадовлинь валот. Видеть, вадрят! — цяпазевсь Ваня. — Ленань истятнэсэ маник? Маштат, маштат, цёра.
—  Тонсь пейдят, тонсь мокшнат сюворят… — мерсь Коля. — Ды тонсь весементь чарькодьсак: сон тонеть а велявты.
—  Эряви тень истямось! Иля пеле, тонь эйстэяк оргоди! — Ваня лавтовсо тулкадизе цёранть ды, кода алтаськак эстензэ, сыргась кудов.
«Тень истяко а кадома, — кортась эстензэ Ваня. — Эряви мезеяк теемс. Эряви. Арасть, мерят, эрямосонть компромисст? Кирдеде сестэ, бути арасть…» Кежтне Ванянь потсо лаказевсть, тусть Ленань-Колянь эйстэ ве ёнов ды кармасть эрямо сынсь, лия арсематнеде башка. Пек стакаль сынст мадстемс. Ды, паряк, эзь эрявояк: истямо потмоёжодонть а мезть чийнемс, мезе потсот — сень ливтик лангс, иля чатьмоне.