Койтнень ванстыця

Федул весень тюкскавтынзе: кудосотнень, куринкансетнень, мезть тосо, веленек кордонзо пелить. Мартонзо сёвномадо-тюремадо кияк а арсияк, вальмалганзо ютамстояк ваныть, ансяк аволь полоняво костояк.
Мезе илязо лисе, Федул секень пижни:
— Видечинь вешнема кудов яволявкс лангозонк сёрмадан, пекстатадызь!
Та-кода Сея Панько шабразо печксь ваз. Узересэ явшизе сывеленть, сонсь совась кудыкелев очко мельга. Эзь кенере поровтонть трокс пильгензэ ёртомо, Федулонь кисказо, кона теке учось те шканть, амзордызе сывелев пукшонть ды вармакс кудо ёнов.
Панько лиссь, кода неизе, цопадсь пенге полена ды  вы-ы-ыр кисканть мельга. Тона уцорсо эцесь кузтемалов. Азё терявтык нельгемс сывеленть.
Кисканзо лангс поленань ёртоманть неизе Федул.  Кода педи Паньконень:
— Тон кискам маштыксэлик! Мон ва Гаагав пачтян, нейке энгамтадызь! Содат тень кис зяро верьгедян пельдеть?! Понкстомо кадоват!
Мезе тесэ теят, истяк чавонь кедть Панько мурдась кудов.
Омбоце шабразо, Лиза сырькаесь, невтязь кавто саразонзо карькске вельде понгавтынзе кудыкелев — каткань кондямось илязо кузеве. Кодат тосо, Федулонь идемевсесь, атяка каткась, кирнявтсь, сялгинзе кенжензэ  вейкентень ды кирьгас молемс поризе.
Лизака лиссь сывель мельга, вансы: ниле пильгсэсь тей-тов утякстни карьксэнть песэ, урнозь цямки кургсонзо. Сырькаесь ансяк анокстась кедьёнкс —  ципуштамс салыцянть, —  тона кивчк кудо пряс, азё кенерть мельганзо.
— Вай, идемевсь, вай, пси тонол пачкат! Вант, сывелем сэвизе. Те таго Федулонсесь. Эрьга, молян тензэ. Пандовтса саразонть питнензэ! — музгордсь  сырькаесь.
Кенкшенть панжизе сонсь азорось, прясто пильгс онкстызе вановтсонзо сыцянть.
— Мезе эряви? —  мельтеме кевкстсь.
— Инеськеть, Федул, вана… — Лизака венстизе карькскенть, конань песэ лыйнесь саразонь кирьгась. — Тонь идемевсень каткат саразонь сывелем поризе. Паряк, питнензэ пандсак? Эдь, ловт, ие андынь-кастынь эйсэнзэ. Сон, вант, ве валскес трескизе.
— Эка-а, мезть лавги! Ванта-а, монь каткам сэвизе саразонзо! Тон содат, сонсь батюшкась сакшнось баславамонзо? Сон монь ине псака, чеерь а покорды! Тон кортат — истямо-тавтамо. Саты лакштордомс, течике каян лангозот яволявкс видечинь идема кудов каткинем лангс стяко кортамонть кис! Пельдеть ярмакт лутавтан, мейле кармат содамо!..
Лиза сырькаесь лый-лай кузтематнева алов, удалов апак варшта ношкстась
кудо ёнов, сонсь кедьсэ аволязь кортась:
— Вай, пингень парозот, оштё визьксчамава кувалмат эзинь яка…
Мельганзо зярсыя кайсететсь Федулонь кардыця вайгелезэ.
Истя, каня цидярдат каршонзо, эдь сон прянь идемань койтнень-кирдатнень «содыця».