Ки соды костонь...

Скалонь потявтыцятне валске марто молить кудов. Вейсэнь кардтнэстэ веленть видьс юткось пельвайгельбешка. Эскелить истя, ки мезде соды, седе корты. Кургтнеде кемень, ансяк кенерть кунсоломо.
Кинть пелензэ ютакшнызь, тесэ тость лоткавсть — яннэнть чиресэ наронть лангсо празь цёраломань. Аватне стясть перьканзо, арсить, кода улемс, мезть тейнемс.
— Те истя мезе мартонзо, чей, эзь чунжа? — кевкстсь Панинькань Окся, комась празенть вельксс, пелезь токизе кирьганзо, кецязь мерсь: — Лембе… эрий… Чапамо чинесь, чапамо чинесь эйстэнзэ! Мамштазь.
— Кие истямось? — пшкадсь Дёняй Мару. — Эсенек кияк?
— Ки соды, чамазо наронть потсто а неяви, — каясь Окся.
— Чей варштык! — кармавтсь Мару.
— Эно, сыргозиндеряй, судот порксасы, — потазевсь Окся.
— Эх уш, безарькай, нолдамизьгак, — эцесь куншкас Бояронь Олда, конань Пазось сэрьсэ-келесэ велькска казизе.
Сон уцорк празенть сиведе, бот кунст путызе.
— Арась, а минек велень, — ульнесь вейсэнь ёвтамось.
— Э-э-э, сон аволь ансяк а минек велень, натой а минек кужонь! — поладсь Олда.
Аватне ялатеке истяк эзизь кадо пиштяканть. Раздесть нар, кавшакавтызь, тодовонь таркас тонгизь цёранть прянзо алов. Ды, шумбра удомань алтазь, поладызь кист.