Фыр-фыр ды ав-ав

Вейке а покшке ошсо эрясь атяка катка, лемезэ Фыр-фыр. Сон ульнесь тюжала (рыжий) пона ды киньгак эзь кунсоло. Фыр-фыр кузнесь лато прява, чарась каськава, кундсесь чеерть, тандавтнесь нармунть ды ципакат. Сеедьстэ орголесь кардазсто ды лытась лиянь пирева ды утомга.
Теке жо кудо-кардазсонть эрясь Ав-ав кискась.   Поназо – раужо марто ашо. Сон породавтомоль, ансяк тевензэ тейсь, мерят, теке алкуксонь ванстыця киска. Весень мельга кардазсонть вансь пштистэ. Содылинзе   эсь кудонь ды, натой,   шабрань саразтнэньгак, ципакатненьгак, атякштнэньгак, утякатненьгак. Фыр-фырэнь кискась а вечкилизе. Катканть лангс сон сеедьстэ онгсь, кежень сазь, бути понгиль, сусконизе пулонзояк. Сехте пек а вечкиль Ав-ав, зярдо Фыр-фыр тукшныль кудосто. Сестэ сон муилизе варянть, кува каткась орголесь, невтилизе азоронтень, тонась пекстылизе якамо тарканть.
Весть Фыр-фыр оргодсь кардазсто, чарась-чарась ды понгсь кудонь стявтома таркас. Тосо маляртнэ ваднесть стенат ды потолокт. Никсинзе каткась клей марто банкатнень, езызе копорензэ краска боцькантень, токизе лапасонзо очкинесэ суликань ваднемапеленть ды эль эзь педя эйзэнзэ. Те шкане сонзэ редизе раужо уса марто, газетасто теезь пилоткасо кежей строителесь.
– Те тон месть тия лытат! – серьгедсь сон.
– Брысь тестэ!
Фыр-фыр тандадсь кирнявтсь боцьканть, мейле кузтеманть лангс, эзь кирдеве ды прась видьстэ пор марто кескавонтень. Кескавсонть озясь-озясь ды тюжала каткасто теевсь ашокс. Сон натой кежей строицянтеньгак эзь содаво. Кода жо тонась содызе, пейдезевсь, панжсь кенкш ды нолдызе пайстомонть ушов.
Фыр-фыр тандадозь, ежонь апак маря, чийсь кудов, ансяк Ав-ав а нолды эйсэнзэ кенкшка.
– Азе тестэ! – мери Ав-ав. – Минек арась ды зярдояк арасельть ашо катканок! Минек вейке – тюжала. Сеяк прябезарькс.
– Ды те мон – Фыр-фыр. Нолдамак! – энялды каткась.
– Мон прынь пор марто кескавс, секскак ашокс теевинь.
– А нолдатан! – кеместэ кирди прянзо кискась.
– Бути тон тюжалат, азе шлик прят! Теде мейле соват кардазонтень!
Теемс а мезе, тусь Фыр-фыр лей лангов. Шлясь, шлясь ды таго теевсь тюжалакс.
– Ней вана кармить Фыр-фырэнь енов молеме, – мерсь Ав-ав ды панжизе каткантень кенкшенть.
Ансяк тарка-эземень а содыця каткась а аштеви таркасонзо. Вейке чи ковгак эзь яка, мейле таго оргодсь кардазстонть. Кузсь шабра покш кудонь лато пряс, истя арсесь сасамс озяканть, седе тов кузсь труба пряс ды прась содов варянтень.
Улевельгак теле, видьстэ каштомонь-каминэнь толонтень понговоль. Ней жо, зярс ливтясь трубаванть, тюжала каткасто теевсь тунь раужокс. Сонсь эсь прядонзо тандадсь, ды тесэ эште азорось коцькерьгансо карязонь трокс тензэ макссь. А помнияк, кода панжадо вальмаванть ливтясь. Сась кудов, Ав-ав таго эйсэнзэ а нолды.
– Минек кудоютксо   зярдояк раужо каткат арасельть! – корты кискась.
– Оргодть тестэ куроксто, бути арась мелеть пуловтомо кадовомс!
– Ды мон аволь раужан, мон тюжалан! – иди прясонзо Фыр-фыр.
– Те мон трубава прынь ды содсо вадневинь.
– Бути тон вадневить, – корты Ав-ав, ­– азе шляк, сестэ соваткак кардазонтень!
Теемс а мезе. Тусь лей лангов Фыр-фыр. Шлясь, шлясь, кой-кода шлявсь, ды таго теевсь тюжалакс.
– Вана ней тон молят минек превтеме катканть енов! – мерсь кискась, зярдо Фыр-фыр сась кудов.
– Ансяк икелепелев теть мерян, бути эште весть оргодят, кудов уш а нолдатан.
Недля, паряк кавто, Фыр-фыр ковгак эзь яка. Ансяк таго эзь цидярдо. Мусь пирявкссонть варине ды оргодсь. Чарась велясь ульцяванть ды понгсь та-кодамо конторас, косо важодсть ламо ломанть. Сынь ловсть, ловность, сермадсть, гайневтсть телефонсо… Фыр-фырэнь само шкастонть конторасонть ульнесь обед ютко ды ломантне тукшность кие ярсамо, кие ульцява ютамо. Контора кенкштнэнь панжнизь коштонть ваньськавтомга.
Фыр-фыр ютась стольтнень юткова, никсинзе уголтнэнь, аламос кеверькшнесь прявтонть чевте озамо таркасонзо, налксесь покш столенть лангсо карандашсонть. Те шкане кие-бути совась ды кода серьгеди катканть лангс:
– Тон мезть тесэ теят,   пондакш пря! Чиезь тестэ!
Фыр-фыр тандадсь, прявтонть столензэ лангсто кирнявтсь лия столь лангс, правтызе чернила марто покш кедьгенть, пацькизе весе столенть, сонськак прясто пильгс вадневсь. Вейкеяк тюжала панкске катканть понас эзь кадово. Чернилась ламоль – те столенть экшсэ аштесь бухгалтерэсь ды сермадсь ламо коневт.
Фыр-фыр сорновтынзе понанзо ды куроксто оргодсь панжадо вальмаванть. Чийсь кудов, кенкшенть вакссо Ав-ав кевкстни эйсэнзэ:
– Те кодамо истямо ракша тезэнь сась. Зяро эрян, вейкеяк сэнь катка эзинь некшне! Кискаяк сэнь эзинь некше! Нумолояк эзинь некше! Атякштнэ наряжамо вечкицят, сетькак сэть а эрсить. Тук тестэ! А панжса теть кенкшенть!
– Ды те мон – Фыр-фыр! – иди прянзо каткась. – Мон конторасо чернила валынь ды пацькавинь.
– Бути пацькавить, азе шляк, – кежейстэ корты Ав-ав.
Мезе теят, кунсолома ванстыцянть. Таго тусь Фыр-фыр лейлангов. Шлясь, шлясь… Истяяк, лиякскак… Эрьва кода, ансяк чернилась кодаяк а шляви. Истя кадовськак Фыр-фыр сэнекс. Мезе теемс? Таго велявтсь кудов. Кискась лангозонзо кежейстэ:
– Мон жо теть меринь, азе шляк. Тееват тюжалакс, нолдатан.
– А тееван мон тюжалакс, – эль а аварди Фыр-фыр.
– Чернилась а шляви.
– Истя теть эрявияк, прябезарькс катка! А кармат лиянь кардазга лытамо!
– Мезе ней монень теема?
– Мезеяк! – пейдезевсь Аф-аф.
– Азе ульцява чарак семс, зярс од пона теть касы.  
– А зярс сон карми касомо?
– Ие, паряк кавто.
– Истя куватьс? Косо мон карман эрямо?
– Косо мелеть. Лопа ало, кирмалав потсо.
– Тосо монь пиземе начтсамам, мон кельман… Нолдамак кудов…
– Кельмсят-теят, превс соват…
– Мон а карман седе тов истя тееме, – аварьгадсь каткась.
– Иля аварде, начтсак моданть, рудаз теят,– мерсь кискась.
– Азе кудо прясо эряк! Мерян теть утомга, каськава якамс, чеерть кундсемс, зярс од пона теть касы. Вант, ульцяв иля лисне, нетядызь охотниктне, идем ракшакс путтадызь, кундатадызь ды зоопаркс макстадызь.
Тундос Фыр-фыр эзь лисне ульцяв. Весе чеертнень ды крысатнень сон пансинзе. Сэнь понанть каизе ды таго теевсь тюжаласс. Ансяк пильге цюлканзо ды галстукозо кадовсть сэнелакс. Ав-ав теде меле лемдизе катканть сермадеекс (писатель).