«Чиявтызе…»

Весть прявто́шсо ульнесь тев,
Ёвтнеса тенк педе-пев.
Вейке со́давикс «банка́со»
Киякст шлякшнось покш швабра́со
Мазый шумбра авась Клава.
Сон а кандыль берянь слава,
Свал весень марто шумбра́кстниль,
Ансяк мирдевтеме майсиль.

Весть та-кода шлиль сон о́фис,
Ды тесэ симеме ко́фе
Марь Сергеевна терди́зе,
Ды састыне ушоды́зе:
—Клава, мекс тон ськамо́т пиштят?
Чаво кудос врадат истя,
Тошначиденть азаргада́т!
Умок арсемаль поладо.
Клавань чамазояк олась:
— Ды косто тень саемс поланть?
Марь Сергеевна мизолды,
Соды тевденть, а кавтолды:
—Тень кисэ иля мелявто!
Ней сынь Интернетс совавтозь!
Тоньгак чачот «штёлкадьсыне́к»,
Шанжавкоцтонтень «путсыне́к»!
— Вай, ды мон апак наря́жа!
— Таго вешнят стяконь ка́жо!

Фотошопсо вете кликть,
Ды кармат прок сонсь Джоли!
А кенери чись валгомо,
Бредэнь Питт мутано колмо!
Важодема таркат – банк,
Истя тей сёрмадангак.
Кикс тесэ важодя́т-улят —
Истят мон а путан куля́т…
Ванта! Эзь ютаяк шкась,
Тонеть сёрмине уш сась!

Клава кучовксонть ловнызе
Ды кургонзояк автизе!
Марь Сергеевна:—Мезть тон?—
—Сон веши… пельмиллион!
Арсесь, нать, мон пек сюпава́н,
Эли банконь азораван?
Ды ламо истят «вечкицят»
Бажасть муемс эстест трицят:
Кие «бизнес» покш витевель,
Ки кредиттнэде петевель…
Чондат весенень эрявить,
Кисэст эрьвась прянзо чави!

— Марь Сергевна, некак, саты!
Лопам тон допрок урядык!
Кадык вешнить лия Клават
Сеть, кинь эсест зепест чавот.