Чапамо медь

Валскесь лембель. Лёмзёркс чинесь пештизе пертьпельксэнть. Нармунтне апак лотксе чоледсть кизэнь морост.
Фома панжинзе сельмензэ, ютавтызе вановтонзо кудованть: а куш а каш. Кепедизе стака прянзо тодовонть лангсто, стясь. Чиремкшнезь мольсь ведь марто ведрантень, кедензэ сорныть, пеензэ кальцькаить кедьгень чирентень. Варштась вешкезементь лангс, панжтнинзе кастрюлятнень — чавот. Коня алга варштась каштланго ёнов ды корсяня вайгельсэ пижакадсь:
— Вачодо, нать, куловтовлимик?! Атякштне умок сыргозсть, тонь кодаяк удомат а яви...
Каштлангсо сэредиця низэ велявтсь бока лангс, эль марявозь, кувсезь ладсо кортазевсь. Валонзо Фоманень эзть чарькодеве, ды сеске ледсь мелезэнзэ: низэ ормалгадсь. Аламос аштезь, Фома кевкстизе:
— Мейсэ теть лездамс?
Варя таргась тодов алдо паця сюлмине, сокарясь-тейсь, венстсь вете целковойть.
— Азё медь рамак, паряк, аламодо псинть валгстсы.
Фома, петишноенть неезь, натой сорнозевсь.
— Вант, илить ютавто чапамо веденть лангс, — кармавтсь нись.
Фома тонгинзе кемензэ, каясь лавтовганзо ташто фуфайка, сайсь чакшке ды мельспаросо лиссь кудостонть. Кецямодонть марявсь тензэ, прязояк седе оймась. Мольсь апак капша, ярмак марто кедензэ кирдсь зепесэ. Мелезэ ульнесь вейке: нолштамс прянь витиця «надобиядонть». Пильгензэ сынсь ветизь винань лавкантень. Мекев тосто лиссь сулика марто. Петишникстэнть кадовсть ансяк чоледицятне.
«Кода ней кудов сован?» — Фома лоткавсь кузтемпес, нинть кувсематнеде ледстязь, апаркстомсь. Аштесь-тейсь зярсыя, сыргась ков сельмензэ неить.
Апак учо каятотсь кискань онгома. Фома чарькодсь, кинь неть кискатне. Кеменьшка минутань ютазь пачкодсь нешкепирень кудонтень. Тона чаволь.
«Тесэ ней монсь азорось!» — муст-муст пейдезевсь Фома ды чакшкесэнть амольдясь флягасто медь. Эзь кенере сельмензэ кончтамо, кода мекштне вейке-вейке мельга каявсть эйзэнзэ. Фома прянь-полдань синдезь ношкстась вирь кияванть ды мезе вий рангсь:
— Иде-е-емизь!
Веленть песэ ульнесь апокш сёлт, тозонь эрицятне яла левшекс ваявтнесть керть. Фома прянек-пильгенек чопавтсь ведентень.
Сон аштесь сёлтсонть чоподанть самс, семс, зярс эзизь кадо мекштне. Аштесь веденть куншкасо ды пельсь лисемс. Те шкастонть сёлтонтень састь колмо оят калонь кундсеме.
Кодак неизь «идемевсенть», ёртнизь ульмаст ды мезе вийть ношкстасть эйстэнзэ. Фомаяк лиссь ведьстэнть ды, теке начко сараз, сыргась кудов. Пачкодсь пирес — пей пей лангс а понгони: кельме копачизе весе рунгонзо. Таргась цигаркат — начкот. Истя апаркстомсь — куш авардть.
Зярдо нись неизе сонзэ, натой озавсь: кенкш удало аштесь пиже чекарьсэ тапарязь пря ломань.
— Вай, Нишкепаз, идемак... — кувсезевсь авась. Цопадсь коцькерьган, стясь стуворонть икелев, кармась эйсэнзэ аволямо. — Оргодть, оргодть тестэ, мерян! Азё тов, косто сыть, мень шайтян кандынзить!
— Варя, те мон, мирдеть... Эли, ойминем, эзимик сода? Нолдамак, пачк кельминь, — энялдозевсь цёрась.
Авась клавцкадизе кенкшенть, Фомань судозо эль эзь тапаво. Паро, шкастонзо прянть кенерсь таргамо.
Лиссь Фома кузтемпес, озась келей лазонть лангс, эзь сода, мезть теемс. Пряванзо велясь секе янксемась: «Вай, кодамо чапамо салазь медесь...».