А содави, козонь пры монь валом...

А содави, козонь пры монь валом:
Пильге алов эли киньгак седейс.
Паряк, карми цёхмадезь аксялов,
Паряк, чалги сэредиця сэдявксс.

Кода чачи? Паряк, кеняркс ютксто?
Эли салавине авардемстэ?
Кода карми кодазь? Зяро тюссто?
Зяро сэредькст панжи? Зяро пексты?

Мезеяк мон сондензэ а содан,
Икелепельксэнзэ а ёвтаса:
Каштанчи кувалманзо копордан
Эли визьксэнть танстензэ ледстяса?

Кевкстематне яла гувныть-палыть,
Эрьвась домка, эрьвась талновтыця.
Ансяк кинь туртов кенерстян валонть,
А муевиндеряй чарькодиця?..